Эфект Трусіка

Этыс! Атыс! Аніматыс! Этыс! Атыс! Аматыс! Музыкі ды эксперты спрабуюць расшыфраваць код "Чароўнага Трусіка" Юрыя Дземідовіча. Беларусь накрыла хваля трусікаманіі.

Заварожваючы нумар да дзіцячага "Еўрабачання" абмяркоўваюць не менш, чым расейскі крэдыт ці малочную вайну. Меркаванні – самыя розныя: ад захаплення новым беларускім псіхадэлам да абвінавачанняў хлопчыка Юры Дземідовіча ледзь не ў сатанізме. У сеціве ўжо нават гуляюць дзясяткі версій перакладу трусікаўскай лаціны.

Кампазітар і выканаўца Васіль Раінчык падкрэслівае, што не можа публічна ацэньваць нумар Юры Дземідовіча, бо з’яўляецца старшынём журы адборачнага конкурсу да дзіцячага "Еўрабачання".

- Я адно скажу: калі нешта ў любым мастацтве выклікае спрэчкі, значыць, – цікава. Больш пакуль нічога не магу сказаць з-за этычных прычынаў.

Пры гэтым Васіль Раінчык задаў сваё пытанне карэспандэнту "Мы":

- А вам спадабалася песня?

- Разоў 5-6 праглядзеў. Уражвае.

- Ну вось бачыце – такая колькасць праглядаў кажа сама за сябе: неардынарна.

На думку ж Сяргея Будкіна, галоўнага рэдактара музычнага парталу "Тузін Гітоў", мы маем справу з сеансам масавага гіпнозу, які свядома ці несвядома ўдалося правесці маленькаму хлопчыку.

- Гэта нейкі медыя-вірус. З’ява кшталту ролікаў вулічнага мага Дэвіда Блэйна, які таксама мае шалёны поспех у сеціве.

Будкін адзначае, што ў музычным плане "Чароўны Трусік" поўнасцю адпавядае апошнім тэндэнцыям.

- Тут можна пачуць і тое, што зрабілі ў апошнім альбоме Prodigy, нешта ёсць і ад Massive Attack.

Што да музычнай будучыні аўтара "Чароўнага Трусіка", то Сяргей Будкін зазначае:

- Калі глядзець іншую версію роліка (дзе Дземідовіча мы бачым не толькі на сцэне), то перад намі зусім другі чалавек – поўнасцю адэкватны. І калі гэты хлопчык так лёгка ўваходзіць у ролю на сцэне, то ён можа стаць проста афігенным артыстам цягам нейкага часу.

Лідэр гурта "Палац" Алег Хаменка сказаў, што нічога звышнатуральнага ў "Чароўным Трусіку" не бачыць.

- Гэта такія самародачкі, сапраўды нейкі паралельны сусвет. І гэта вельмі добра, што яны ёсць і што такое з’явілася і ў Беларусі. Такія фенамены ўзнікаюць увесь час – і ў Расіі, і ў Польшчы, паўсюль.

- Не думаю, што "Чароўны Трусік" – доўгатэрміновы праект, - лічыць Хаменка. - Але зазначу, што такі не тое, што крэатыў, а так званы inside, адсочваецца і аналізуецца прадзюсерамі ўсяго свету. Іншая рэч, што звычайна – як паказвае сусветны досвед – гэта не бывае доўгатэрміновымі праектамі.

Лідэр "Палацу" не згодны з меркаваннем, што такія нумары належаць фрык-культуры.

- Гэта – не фрык. Яго песня была створана дзякуючы таму культурнаму фонe, у якім Юры жыў і развіваўся. Менавіта ягоныя бацькі стварылі вось такі сусвет, у якім ён можа сябе так вольна і нечакана сам сябе адчуваць. І менавіта таму ў свеце да такога ставяцца вельмі сур’ёзна. Як з’ява – твор Дземідовіча, без сумневу, варты ўвагі.