Cерыя мерапрыемстваў для журналістаў прысвечаных мове варожасці ў медыях

UDF.BY

16-17 снежня у Мінску пройдзе шэраг мерапрыемстваў прысвечаных мове варожасці ў беларускіх медыях. Мова варожасці ў сучасных медыях — з'ява нярэдкая. Яна прымае розныя формы і ўдала маскіруецца ў тэкстах пад жарты ці асабістае меркаванне. Як гэта працуе, навошта медыя выкарыстоўваюць «мову варожасці» і чаму гэта датычыць нас асабіста распавядзе праект «MAKEOUT», які запрашае правесці выходныя 16-17 снежня без мовы варожасці, каб разам падумаць і адказаць на гэтыя пытанні.

Уваход на ўсе мерапрыемствы бясплатны. Мерапрыемства пройдуць у Press-club (Мінск, вул. Веры Харужай 3, офіс 601). Cтаронка мерапрыемства на Facebook.

Праграма на 16.12


13.00 - 15.00 - Public-talk з Аленай Касцючэнка («Новая Газета», Расія)
Алена Касцючэнка — расійская ЛГБТ-актывістка і журналістка «Новай газеты». Гэта яна пісала пра першыя крокі Pussy Riot і брала інтэрв'ю ў гея з Чачні, які выжыў пасля выкрадання і катаванняў. Сферай яе прафесійнай зацікаўленасці з'яўляюцца «нябачныя супольнасці»: наркаспажыўцы, сэкс-працаўніцы, сацыяльныя сіроты, супрацоўнікі паліцыі, мігранты.

Як працаваць і жыць на скрыжаванні журналістыкі і актывізму? Чаму актывістам і журналістам часам так складана супрацоўнічаць? Як пераадолець узаемныя стэрэатыпы, і ці могуць быць агульныя мэты ў СМІ і ЛГБТ-супольнасці? Пра гэта і многае іншае Лена раскажа праз асабісты досвед.

15.00 - 15.30 - Кава-брэйк

15.30 - 16.00 - Прэзентацыя «Канвеер стэрэатыпаў: гендар, сексуальнасць і мова варожасці ў электронных медыя Беларусі»
Сёлета нашыя калегі актыўна маніторылі працу папулярных медыяў на прадмет мовы варожасці. Мы таксама не засталіся ўбаку і на прыкладзе вясновых публікацый паспрабавалі зразумець, як аўтары канструююць мову варожасці. Высновамі і вынікамі гэтага актывісцкага даследавання MAKEOUT гатовы падзяліцца падчас сустрэчы.

16.00 - 18.00 - Дыскусія «Словы і сэнсы»
Наколькі часта мы сутыкаемся з «мовай варожасці» і ці заўважаем, як часам самі наўмысна ці не прадукуем яе? Ці кожны некарэктны выраз і неасцярожнае выказванне з'яўляюцца прыкладам hate speech? І якую ролю тут мае кантэкст выказвання?

На дыскусіі мы абмяркуем, якая сувязь паміж рыторыкай нянавісці і рэальнай дыскрымінацыяй, з якой сутыкаюцца прадстаўнікі і прадстаўніцы ўразлівых групаў. А таксама паразважаем, якім чынам мы можам уплываць на журналісцкую працу, даведаемся, якія дзеянні ўжо ажыцяўляюцца ў сучаснай Беларусі і ці могуць новыя тэхналогіі дапамагчы нам у гэтым.

Інфармацыя пра ўдзельніц і ўдзельнікаў з’явіцца ў хуткім часе.

Праграма на 17.12


12.30 - 16.00 - Варкшоп «Мова варожасці: зона маёй адказнасці»
(неабходна папярэдне зарэгістравацца па спасылцы)

Як пісаць на адчувальныя тэмы і не аблажацца? Дзе заканчваецца рэдактарская адказнасць і пачынаецца аўтарская? Ці ёсць адказнасць і ўлада ў чытача? Што рабіць, калі ў інтэрв'ю ёсць дыскрымінацыйныя выказванні? Колькі тэкстаў з мовай варожасці апублікаваў за 4 гады MAKEOUT? Вучымся на памылках разам.

17.00 - 19.00 - Прэзентацыя інтэрактыўнага дакументальнага фільма «Слова» (Расія)
Гэты фільм кажа пра вельмі простыя рэчы — пра нянавісць, пра чалавечнасць, пра мову варожасці, і тое, якую сілу мае вымаўленае ці напісанае слова. У гэтым фільме няма акцёраў. Ёсць толькі 8 герояў, якія сутыкнуліся з сілай вымаўленага слова. І ёсць наступствы — рэальнасць, якая атачае ўсіх нас. Гэты фільм — інтэрактыўны, а гэта значыць, што досвед узаемадзеяння з ім залежыць ад кожнага гледача.

«Фільм доўжыцца шэсць з паловай хвілін, аднак за гэты кароткі час глядач паспявае прайсці са словамі нянавісьці шлях ад жартаў з Камеды-Клаба да рэальнага гвалту, які прыводзіць да смерцяў. За гэты ж час ён паспявае пражыць прамовы нянавісці і рэакцыі герояў на гэтыя рэплікі – ад іроніі і скепсісу ў позірку, да мёртвай цішыні з моцна сціснутымі зубамі», — з рэцэнзіі Ксеніі Падольскай, мастацтвазнаўцы, аспіранткі кафедры мастацкай адукацыі і дэкаратыўнага мастацтва РГПУ ім. А.І. Герцэна.

Пра тое, для чаго і як быў створаны гэты фільм, і пра тое, з якой рэакцыяй сутыкнуліся яго стваральнікі, раскажа Святлана Захарава, мэнэджэрка па камунікацыях і член_кіня Савета Расійскай ЛГБТ-сеткі.

Новости по теме

    Вольскаму дазволілі спець перад выбарамі

    Лявон Вольскі сольна, з "Крамбамбуляй" пакажа праект "Белая яблыня гроому" і сыграе новым песні на вялікім канцэрце ў Мінску 16 снежня. Дазвол на правядзенне мерапрыемства арганізатары атрымалі з цяжкасцю, давялося нават узгадняць з чыноўнікаміподробности

Новости других СМИ