Канцэрт “Ляпісаў“ забаранілі ў Пскове - камэнтар гурта

Сяргей Будкін, Tuzin.fm
12 марта 2014, 10:29
Адміністрацыя клюба "Пароход", дзе мусіў прайсьці канцэрт беларускага гурта, паведамілі арганізатарам, што адмаўляюцца ад правядзеньня мерапрыемства.

Тлумачэньне таго, чаму пскоўскі клюб адмовіўся ад канцэрту, на які было прададзена ўжо 90% квіткоў (зьмяшчальнасьць пляцоўкі ля 2000) – досыць цьмяная. "Прадстаўнікі клюбу паведамілі нам, што было тэлефанаваньне «самі-ведаеце-адкуль» (месца адкуль тэлілі не было канкрэтызавана) наконт таго, што ў сувязі з сёлетнімі выбарамі губэрнатара Пскоўскай вобласьці ня варта праводзіць у горадзе канцэрты такіх гуртоў. Пасьля чаго яны вырашылі не праводзіць мерапрыемства", - патлумачыў Tuzin.fm прэс-аташэ гурта "Ляпіс Трубяцкі" Аляксандар Бергер.

Адмены канцэрту беларусаў у Пскове актыўна дамагалася мясцовая філія Камуністычнай партыі Расеі. "Група вязе (у Пскоў) свой новы альбом "Матрешка", у якім у непрывабным выглядзе прадстаўлена Расея зь яе расейскай моваю, лідэры Савецкага Саюзу. Сяргей Міхалок вызначыўся нядаўна выступам на эўрамайдане, дзе падтрымаў дзяржаўны пераварот на Ўкраіне", - вялося ў звароце камуністых.

З нагоды адмены канцэрту 14 сакавіка ў Пскове ў расейскіх прыхільнікаў гурта зьявілася такое тлумачэньне. "Можа канцэрт адмянілі проста ў мэтах бясьпекі саміх жа «Ляпісаў» ды спакою пскавічоў з актыўнай палітычнай пазыцыяй. Бо іх жа проста на кавалкі маглі б разарваць праз тое, што яны на майдане зладзілі. Ды сарваць канцэрт. Можа і да лепшага, што адмянілі", - піша адна з слухачак.

"Пазыцыя гурта такая – мы добраахвотна ад заплянаваных выступаў у Расеі адмаўляцца не зьбіраемся. Тур у падтрымку "Матрёшки" – самы пасьпяховы за ўсю гісторыю гурта. І няма наогул размовы пра тое, што музыкі могуць нечага ці некага спужацца. Мы робім тое, што задумалі, і працягваем тур па ранейшым раскладзе", - заявіў "Тузіну" Аляксандар Бергер.

У сакавіку "Ляпісы" дадуць канцэрты як у расейскіх Смаленску, Екацерынбургу, Цюмені, так і ва ўкраінскіх гарадах – Палтаве, Харькаве, Луганску, а ў красавіку – Данецку, Днепрапятроўску, Адэсе, Хмяльніцкім і Львове.
Заметили ошибку? Пожалуйста, выделите её и нажмите Ctrl+Enter
Дорогие читатели, не имея ресурсов на модерацию и учитывая нюансы белорусского законодательства, мы решили отключить комментарии. Но присоединяйтесь к обсуждениям в наших сообществах в соцсетях! Мы есть на Facebook, «ВКонтакте», Twitter и Одноклассники

Новости других СМИ