Азаронак вядзе прапаганду сярод глухіх

Адзін з галоўных дзяржаўных прапагандыстаў, аўтар скандальна вядомага фільма "Дзеці хлусні" Юры Азаронак цяпер працуе дырэктарам новага тэлеканалу – "Жест-ТВ", заснаваным грамадскім аб’яднаннем "Беларускае таварыства глухіх".

- Гэта добры, сямейны, спакойны, пазнавальны канал, які толькі пачынае сваё вяшчанне праз мінскую кабельную сетку, - распавёў www.udf.by тэлевізійны дзеяч, вядомы з cваіх адыёзных фільмаў. З яго слоў на тэлеканале для глухіх не абыходзіцца без палітыкі:

- Мы апавядаем пра ўсё тое добрае, што робіцца ў нашай дзяржаве. Аснову ж эфіру складаюць – тэлесерыялы, мультфільмы, пазнавальныя праграмы, якія суправаджаюцца субтытрамі ці перакладам з дапамогай жэстаў.

Датычна ж сваёй асабістай пазіцыі адзін з галоўных прэзідэнцкіх прапагандыстаў зазначыў:

- Я ніколі не змяняю сваіх перакананняў.

Нагадаем, што летам 2008 году Юрыя Азаронка звольнілі з пасады намесніка старшыні Белтэлерадыёкампаніі "за учынак, які несумяшчальны з знаходжаннем на дзяржаўнай службе". Ён ўзначальваў беларускую дэлегацыю на фестывалю "Еўрабачанне-2008". Кажуць, што ён тады так растроіўся пасля неўдалага выступу Руслана Алехно, што адмовіўся ехаць з дэлегацыяй у Мінск.

Якраз сёння высветлілася, дзе знайшоў працу іншы беларускі тэледзеяч – Ягор Хрусталёў, які нечакана звольніўся з пасады генпрадусара ОНТ і два месяцы быў без працы. Як паведаміла "Комсомольская правда в Белоруссии", ён стаў прадусарам спецыяльных праектаў маскоўскага тэлеканалу СТС. Па чутках, на тэлеканале некалькі тыдняў правяралі кандыдатуру новага супрацоўніка, бо засцерагаліся, што за яго адстаўкай мог быць крымінальны след.

Сяргей Нятрэба